Þakklæti í daglega lífinu

Eitt lítið ráð til að setja fókusinn á betri stað í parasambandinu er að tjá maka sínum þakklæti fyrir hluti sem alla jafna maður hefði ekki orð á.

,,Takk fyrir að fara út með ruslið“

,,Takk fyrir að sækja börnin og skutla á æfingu“

,,Takk fyrir að setjast niður með mér og ræða málin“

,,Takk fyrir að …… „

Fyrir marga er þetta ósköp skrítið til að byrja með og sumir hafa orð á að þeim finnist þetta óþarfi og jafnvel óþægilegt að hlusta á sagt við sig. Kannski fyrst en svo þykir flestum þakklæti betra með tímanum, gott að þakka fyrir sig og fá þakkir. Það er mikilvægt að báðir aðilar æfi þakklæti til þess að það auki sambandsánægjuna.

Með því að setja orð á þakklæti erum við að setja athyglina á það sem við sjáum og er gert fyrir framan okkur, þakklæti er að setja orð á að það sem viðkomandi geri fyrir okkur skipti máli og það auki velferð og vellíðan okkar. Að makinn okkar skipti okkur máli, að við viljum að hann viti að það sem hann geri skipti máli og við tökum því ekki sem sjálfsögðum hlut.

Þakklæti skilar sér því í meiri ánægju í parasambandinu og yfirleitt meiri ánægju með eigið framlag innan sambandsins.